香煎一夜情

　　同“一夜情”有关嘅人士唔使紧张，标题讲嘅只系一个菜名，同“咸”有关，同“情”无关，你哋唔使惊俾人香煎。

　　线日小弟喺龙津东一间酒楼食饭，楼面经理噬开排牙推荐我哋食“香煎一夜情”。咦？乜东东嚟嘎？睇清楚旁边嗰张配图，妖！原来系煎鲈鱼。

　　众所周知，粤菜有好多有寓意嘅菜名，比如“发财就手”其实就系发菜猪手，咁呢个“一夜情”又同鲈鱼有乜Q关系呢？“经理哥哥”。呢条友耍手兼拧头：唔知，剩系知大家都系咁叫嘅。

　　或者系我孤陋寡闻吧，但总要虚心向学，唔识就要问。于是上网查，揾人问，卒之俾小弟揾到答案。我顶！乜嘢“香煎一夜情”呀，其实系“香煎一夜埕”。

　　以前，广东啲渔民出海打鱼，因为来回起码要两日，佢哋为咗返归嗰时啲鱼唔变质，就将啲鱼成条放入一个埕里面用粗盐腌一夜（埕：喺广东系指一种用嚟装酒或腌制食物嘅缸瓦器具，相当于外省人所讲嘅坛子）。后嚟大家发现，喺埕里面腌过嘅鱼，唔单只可以保质，味道仲好鬼死正，咁索性将呢种腌鱼叫做“一夜埕”，粤语“埕”“情”同音，中意搞笑嘅人就加多一执“盐”——改叫“一夜情”。好多酒楼觉得呢个名够“味”，就照板煮碗攞嚟用。